Eze 35 | NdeIBE | STEP | Ilizwi likaJehova lafika kimi lisithi:

Ezekiel 35

Isiphrofetho Ngokumelana Le-Edomi

1 Ilizwi likaJehova lafika kimi lisithi:

2 “Ndodana yomuntu, khangelisa ubuso bakho eNtabeni iSeyiri; uphrofethe okubi ngayo

3 uthi: ‘Nanku okutshiwo nguJehova Wobukhosi: Ngimelane lawe, Ntaba Seyiri, njalo ngizakwelula isandla sami ukumelana lawe ngikwenze ube lugwadule oluphundlekileyo.

4 Ngizakwenza amadolobho akho abe ngamanxiwa lawe uzachithwa. Lapho-ke uzakwazi ukuthi mina nginguJehova.

5 “ ‘Ngoba wagcina inzondo yasendulo wanikela ama-Israyeli enkembeni ngesikhathi sosizi lwawo, lapho isijeziso sawo sasesifike ekucineni, 6 ngakho-ke ngeqiniso elinjengoba ngikhona, kutsho uJehova Wobukhosi, ngizakunikela ekuchithekeni kwegazi njalo kuzakulandela. 7 Ngizakwenza iNtaba iSeyiri ibe lugwadule oluphundlekileyo, njalo ngiqede kuyo bonke abafika bahambe. 8 Ngizagcwalisa izintaba zakho ngababuleweyo; labo ababulawe ngenkemba bazawela phezu kwamaqaqa akho lasezigodini zakho kanye lasezindongeni zakho zonke. 9 Ngizakwenza uchitheke okwanininini; amadolobho akho kawayikuhlalwa muntu. Lapho-ke uzakwazi ukuthi mina nginguJehova.

10 “ ‘Ngoba wena uthe, “Izizwe lezi ezimbili lamazwe la amabili kuzakuba ngokwethu njalo sizakuthatha,” lanxa mina uJehova ngangikhonapho. 11 Ngakho-ke ngeqiniso elinjengoba ngikhona, kutsho uJehova Wobukhosi, ngizakuphatha ngokufanele ukuthukuthela lobukhwele owakubonakalisayo ekubazondeni kwakho njalo ngizakwenza mina ngazakale phakathi kwabo lapho sengikwahlulela. 12 Lapho-ke uzakwazi ukuthi mina uJehova sengizizwile zonke izinto ezenyanyekayo owazitshoyo ngezintaba zako-Israyeli. Wathi, “Sezichithiwe njalo sezinikelwe kithi ukuba sizitshwabadele.” 13 Wazikhukhumeza kubi ngami njalo wakhuluma kubi ngami kungekho kuzibamba, njalo ngakuzwa lokho.

14 Nanku okutshiwo nguJehova Wobukhosi: Kuzakuthi umhlaba wonke uthokoze, mina ngizakwenza uphundleke. 15 Ngokuba wena wathokoza lapho ilifa lendlu ka-Israyeli lichitheka, leyo yiyo indlela engizakuphatha ngayo. Uzaphundleka, wena Ntaba yeSeyiri, wena kanye le-Edomi yonke. Lapho-ke bazakwazi ukuthi mina nginguJehova.’ ”